sabi ko
ayaw kong maglaba sa gabi
hindi ko alam kung bakit
siguro’y ayaw kong makitang
nakasungaw ang bituin sa ulap
at pinapanood ang bawat kong kusot
pero hindi kagabi—
ang totoo
naglaba ako
sinamantala ko ang pangungulimlim
ng bituin sa nangingilid na ulap
at natitiyak ko
maputi ang aking nilabhan
sinunod ko yata ang bawat instruksyon
sa likod ng pakete ng tide ultra:
1. kunin sa timba ang damdaming
matagal nang ibinabad
2. kusutin nang mabuti
pabulain
pabulain upang matiyak na
natatakpan na ng bula
ang mga salitang noon pa sana sinabi
3. at dahil nahuli na sa sikat ng araw
na siyang pagkukulahan,
lagyan na lamang ng clorox
upang kumupas at walang makakita
sa mantsa ni Eros
4. banlawan
maraming banlaw
at tiyaking maisama sa tubig
ang mga sentimiyento
at panghihinayang
5. ibuhos sa kanal ang tubig
upang makapagtago sa burak
ang mga pagsinta
6. isampay sa mahanging lugar
ang nilabhang damdamin
pabayaan itong makahinga
matagal na rin namang
naikubli ito sa baul
Pagmumuni pagkatapos…
napigaan ko na ang damit
mariin
nakalimutan ko nga lamang
pigaan ang tubig sa aking mata
paalam muna
samantala’y magpapatuyo muna ako—
ng damit
ng mata
sana’y walang makakita
salamat sa pakete ng tide ultra
Akda ni Gilbert M. Sape
Cassiopeia
Jan 28, 2016 @ 07:36:28
Ang galing! Haha
LikeLiked by 1 person
tagalogdito
Jan 28, 2016 @ 08:04:55
Totoo po! Klasik na hugot ♥
LikeLiked by 1 person
Cassiopeia
Jan 28, 2016 @ 08:16:09
Hahaha may kalaliman.
LikeLiked by 1 person
tagalogdito
Jan 28, 2016 @ 08:18:56
Pero madaling maiintindihan ng mambabasa. 🙂 Akalain mo yun, naikonekta pa ni sir Gilbert Sape sa paglalaba ang kasawian sa pag-ibig? Ibang klase! Hahaha!
LikeLike
Cassiopeia
Jan 28, 2016 @ 08:22:29
Ang ibig kong sabihin ay may kalaliman ang pagkakahugot.
Iba rin itong si Sape ano. hahaha
LikeLike
tagalogdito
Jan 28, 2016 @ 08:26:52
Ahhh hahaha oo, parang ang bigat po ng pinagdaraanan. Magaling po siya. 🙂 Ano pa po ba ang ibang mga isinulat niya?
LikeLike
Cassiopeia
Jan 28, 2016 @ 08:28:26
Patay tayo diyan, ngayon ko lang nabasa at nakita ang pangalan niya at ang gawa niya. 😀
LikeLike
tagalogdito
Jan 28, 2016 @ 08:34:11
Ganun ba, oks lang 🙂 ako rin po kasi itong Pag-ibig ayon sa pakete… lang ang alam kong gawa niya. 🙂
LikeLike